Turas go dtí Peil na Gaeltachta sa Rinn 2016

Comórtas Caide Ghael Linn

De bharr a gcuid iarrachta i gComórtas Caide na nGaelscoileanna i gContae Chorcaí, tugadh cuireadh d’imreoirí na gaelscoile dul go dtí’n Rinn i gContae Phort Láirge chun páirt a ghlacadh i gcomórtas na Mumhan. D’fhanadar ansan, i gColáiste na Rinne, thar oíche, is d'imríodar le crógacht is fonn. Bhualadar le páistí ó ghaelscoileanna eile timpeall an chúige, is dheineadar cairde nua. Bhí ana-chraic acu ar an dtrá, is bhain na haon duine acu ard-thaitneamh as an gcúpla lá a chaitheadar sa ghaeltacht. Bhí na múinteoirí thar a bheith bródúil as a gcuid iompair, is an iarracht a chuireadar isteach i ngach aon rud. 

Buíochas le Conchubhair agus le Sinéad a chuaigh ann ina dteannta.

Díospóireacht ag Rang a 6 ar an UN - Na Náisiúin Aontaithe.

Ghlac Rang a 6 páirt i Díospóireacht i gColáiste Dáibhís ar an UN. Is léir go bhfuil cúpla 'Kofi Anann' sa seomra.

Ceardlann Cheoil 2016

Tháinig Shay Lally ón 'Mobile Music School' le déanaí chuig cór agus ceolfhoireann na Gaelscoile chun taispeántas a thabhairt de chnag uirlisí. Bhain na páistí lán taitneamh as an gceardlann. Sheinneadar drumaí, agógó, tambóirín agus sreang dhruma.

An Chéad Chomaoineach 2016

Fuair 60 páiste i rang a 2 an Chéad Chomaoineach ar an Satharn, an 21ú de Bhealtaine 2016. Léigh an tAthair Mac an Taoisigh an tAifreann. Is iad Labhrás agus Sinéad na múinteoirí ranga i Rang a 2 i mbliana agus ba léir an t-ullmhúchán a rinneadar leis an 2 rang. Gabhaimid buíochas le cór agus le ceoltóirí na Gaelscoile a chur go mór leis an searmanas.

Tag rugbaí sa ghaelscoil

Faoi láthair, tá Uinsionn ó Rugbaí na Mumhan ag teacht chun na gaelscoile chun ranganna 3 - 6 a thraenáil i scileanna rugbaí. Is breá linn go léir ár seisiúin leis ar an Deardaoin. N'fheadar an mbeidh an chéad Rodge eile in ár measc!!!

Gairdín na scoile

Fáilte chuig gairdín na gaelscoile faoi stiúir Múinteoir Treasa. Chuir ranganna éagsúla oinniúin, prátaí, gairleog, cabáiste agus leitís maraon le réimse breá de bhláthanna. Thug roinnt páistí isteach sean-bhuataisí baistí agus líonadh iad le hithir agus le bláthanna. Beidh piastlann againn sar i bhfad. Beidh breithimh ag teacht ag deireadh Mí Bealtaine chun measúnú a dhéanamh ar an ngairdín. Bainigí taitneamh as na grianghrafanna.

Cóineartú 2016

Cheiliúraíomar saicrimint na cóineartaithe inné i Séipéal an Aiséirí. Bhí an searmanas faoi riarachán an Easpaig Ó Croidheáin. Bhí cór na Gaelscoile ag canadh ag an searmanas agus chuireadar go mór leis an ócáid. 'Siad seo roinnt grianghrafanna den lá: